Hinggil sa Politeismo ni Medio Cruz at sa mga Tinamaan nito

Habang binabasa ko ang mga naglabasang komentaryo laban sa manggagawa sa sining-biswal na si Medio Cruz – mula sa mga magaganda at mahusay ang pagkakasaysay hanggang sa mga bobong halatang nakikisawsaw lang para “mapabilang”, napapa-iling ako.

Unang kita ko pa lang sa titulo ng exhibit, wala na akong nakitang problema.

Lumabas lang ang problema ng lumabas ang mga magkakaibang interpretasyon. Ang nakakalungkot nito, ang mga nag-interpret na ang mga kathang-sining ni Cruz ay nambababoy sa aming relihiyon, ang siya pang nanggagalaiti na para bang ang kanilang interpretasyon ang wasto at siyang dapat na masunod.

Ang interpretasyong nabubuo ng isang tao ay may kaugnayan sa kanyang sikolohikal na kalagayan na nakaugat sa mga partikular niyang karanasang personal. Ang isang bagay na hugis paru-paro halimbawa, ay maaaring maging isang maskara sa paningin ng iba. Mga magnanakaw naman ang maaaring maging tingin dito ng iba.

You see, kapag pinagmamasdan natin ang isang gawang sining, ang bawat manonood ay may nabubuong kanya-kanyang interpretasyon. Pero at the end of the day, ang interpretasyon ng lumikha ang siyang mangingibabaw. Kaya kung nakapasok na kayo sa mga art gallery, mapapansin ninyo na ang mga aficionados ay taimtim na nakikipagpalitan ng mga salita sa artist para isangguni ang kanilang interpretasyon.

Anyway, batay sa mga salaysay, ang titulo ng kay Mideo ay Politeismo (Polytheism). Doon pa lang sana, diffused na dapat ang tension at kalituhan. Malinaw naman siguro na hindi polytheism ang isinusulong ng Katolisismo(may nagkomentaryong debatable ang puntong ito). Kaya otomatikong nabasura na dapat ang kwestyon sa pambababoy sa relihiyon.

Pero itatanong ng ibang Katoliko, bakit ginamit ang mga imaheng may kaugnayan sa Katolisismo? Bakit pinatungan pa ng imahe ng titi ang isa? Bakit may condom ang isa?

Sagot: dahil ang ginamit na midyum sa obra ay hindi mga banal na imahe. Ibig sabihin, hindi benditado ang mga iyon. At dahil hindi benditado, ang mga imaheng iyon ay simpleng mga imitasyon lamang ng mga tunay na banal na imaheng may malaking puwang sa ating pananampalataya. Ang mga imaheng pilit “ipinagtatanggol” ng ilang self-proclaimed na Katoliko-sarado ay mga imaheng likha ng komersyo. Mga imaheng kumalat dahil sa dulas ng perang imbwelto. At dahil hindi benditado ang mga iyon, malinaw sa akin na walang naganap na pambabastos sa ating paniniwala.

Ngayon, dahil malinaw na walang nabastos na relihiyon, malinaw sa akin na ang naganap na pagtuligsa sa obra ni Mideo Cruz ay masasabing isang porma ng judging the book by its cover.

Ang nakakatakot pa dito, lumalabas na kung sino pa ang mga hindi naka-intindi ang siya pang may lakas ng loob na mang-bully at aktwal na gumawa ng krimen sa gitna ng maraming tao. And to think na ang mga ito’y buong yabang na nagdedeklarang sila’y mga Katoliko. Pinakahuli sa mga nam-bully ay si F Sionil Jose, kasama ang ilang mga hindi nakaka-unawa sa loob ng Senado.

Kaya sinisikap kong huwag mang-bully sa pyesang ito. Instead, papaliwanagan ko pa sila.

Una, ang “Kulo” ay isang “koleksyon” ng mga likhang sining. Dito pa lamang, ang aktitud na dapat ng mga apisyonado ay ganito: ang CCP ay isang kambas na nagtatampok ng isang likhang sining na tinawag na “Kulo”

Ang likhang sining na ito ay binubuo ng iba-ibang midyum, kulay, hugis at stroke(kasama ang ‘Politeismo’) na kapag naging isa ay kumukumpleto sa kabuuan ng mensaheng nais ihatid ng “Kulo”.

Ikalawa, Ang titulo ng kontrobersyal na gawa ni Mideo Cruz ay “Politeismo”. Dito pa lang ay malinaw nang sinasabi ng manlilikhang-sining na ang topiko ay hindi ang Katolisismo, bagkus ay ang Politeismo. Sa halip na anti-Catholicism, dapat ay alam ng mga nagbigay ng negatibong reaksyon kung ano ang makikita nila sa loob. Ang set up kasing mabubuo sa isipan natin kung nauunawaan natin ang polytheism ay isang panteon ng isang polytheist kung saan nakalagay ang mga imahe ng lahat ng mga sinasamba nila.

Ngayon, nakanino ang problema? Kay Mideo Cruz ba? Nasa Obra ba niya? O nasa isipan lamang ng mga kaibigan, kakilala, at kapatid sa pananampalataya natin na unang nagtapon ng bato kay Mideo?